အမေရိကန်ကို ချေမှုန်းမယ်လို့ကြွေးကြော်နေတဲ့ ပြုံယမ်းက လူထုစုဝေးပွဲ

ဇွန် ၂၆၊ ပြုံယမ်း ကိုရီးယားစစ်ပွဲရဲ့ ၇၃နှစ်မြောက် နှစ်ပတ်လည်အဖြစ် မြောက်ကိုရီးယားနိုင်ငံရဲ့မြို့တော် ပြုံယမ်းမှာ လူထုစုဝေးပွဲတစ်ခုကိုကျင်းပနေပါတယ်။ စုဝေးပွဲမှာပါဝင်လာသူတွေဟာလည်း အမေရိကန်ကိုချေမှုန်းဖို့အတွက် လက်တုန့်ပြန်တိုက်ပွဲဆင်နွှဲမယ်ဆိုတဲ့ စာသားပါ ကြွေးကြော်သံတွေကို ရွတ်ဆိုနေကြတယ်လို့ မြောက်ကိုရီးယားပိုင်မီဒီယာက ဒီနေ့မှာအစီရင်ခံပါတယ်။

မနေ့ကကျင်းပတဲ့ ဒီလူထုစုဝေးပွဲကို ပြုံယမ်းမြို့အတွင်းက အလုပ်သမားနဲ့ကျောင်းသားစုစုပေါင်း တစ်သိန်းနှစ်သောင်းခန့်က ပါဝင်ဆင်နွှဲခဲ့ကြတယ်လို့ မြောက်ကိုရီးယားပိုင်မီဒီယာ KCNAကဖော်ပြထားပါတယ်။ KCNA ကထုတ်ပြန်တဲ့ ဓာတ်ပုံတွေအရ လူတွေနဲ့ပြည့်နေတဲ့ အားကစားကွင်းတစ်ခုကိုမြင်တွေ့ရပြီး၊ သူတို့ကိုင်ဆောင်ထားတဲ့စာသားတွေမှာ “အမေရိကန်ပြည်ထောင်စုတစ်ခုလုံးဟာ ငါတို့ရဲ့ပစ်နိုင်တဲ့အကွာအဝေး အတွင်းမှာရှိတယ်” အပါအဝင် “နယ်ချဲ့အမေရိကန်ဟာ ငြိမ်းချမ်းရေးကိုဖျက်ဆီးသူဖြစ်တယ်” ဆိုတာတွေကိုလည်းတွေ့ရပါတယ်။ လွန်ခဲ့တဲ့ တနင်္ဂနွေနေ့မှာပြုလုပ်တဲ့ဒီလူထုစုဝေးပွဲဟာ မေလ ၃၁ ရက်နေ့ကမအောင်မြင်ခဲ့တဲ့ မြောက်ကိုရီးယားရဲ့ထောက်လှမ်းရေးဂြိုလ်တုလွှတ်တင်မှုကြောင့် နောက်တစ်ကြိမ်ထပ်မံလွှတ်တင်မှုတွေပြုလုပ်မှာစိုးရိမ်နေကြတဲ့အချိန်အတွင်းမှာ ကျင်းပခဲ့တာဖြစ်ပါတယ်။ မြောက်ကိုရီးယားဟာ လက်ရှိမှာ နယ်ချဲ့အမေရိကန်ကို အပြစ်ပေးဖို့ အင်အားအပြင်းဆုံးလက်နက်ကိုပိုင်ဆိုင်ထားပြီဖြစ်ပြီး၊ နိုင်ငံအတွင်းက လက်စားချေမဲ့သူတွေဟာလည်း ရန်သူကိုလက်စားချေလိုတဲ့စိတ်တွေတောက်လောင်နေကြပြီ ဖြစ်တယ်လို့ KCNA ကဖော်ပြထားပါတယ်။
နျူကလီးယားလက်နက်ရှိတဲ့မြောက်ကိုရီးယားဟာ လက်နက်မျိုးစုံအပါအဝင် သူတို့ရဲ့အင်အားအကြီးဆုံး တိုက်ကြီးတွေကို ဖြတ်ကျော်ပစ်ခတ်နိုင်တဲ့ တာဝေးပစ်ပဲ့ထိန်းဒုံးကိုပါ စမ်းသပ်မှုတွေပြုလုပ်ခဲ့တာကြောင့် တောင်ကိုရီးယားနဲ့ တောင်ကိုရီးယားရဲ့မဟာမိတ်အမေရိကန်တို့နဲ့လည်း တင်းမာမှုတွေရှိနေတာပါ။
သီးခြားဖော်ပြထားတဲ့ နိုင်ငံခြားရေးဝန်ကြီးဌာန အစီရင်ခံစာတစ်ခုမှာတော့ မြောက်ကိုရီးယားအနေနဲ့ အမေရိကန်ဟာ နျူကလီးယားစစ်ပွဲကိုအရှိန်အဟုန်မြင့်လာအောင် မီးမွှေးပေးနေတယ်လို့စွပ်စွဲထားပြီး၊ ဒေသတွင်းကို သူတို့ပိုင်ဆိုင်တဲ့မဟာဗျူဟာမြောက် ပစ္စည်းတွေပေးပို့နေတယ်လို့ ဆိုပါတယ်။ တောင်နဲ့မြောက်ကိုရီးယားတို့ရဲ့ ၁၉၅၀-၅၃ ပဍိပက္ခဟာ စစ်ပြေငြိမ်းရေးစာချုပ်မဟုတ်ဘဲ အပစ်အခတ်ရပ်စဲရေးအဖြစ်သာချုပ်ဆိုနိုင်ခဲ့တာကြောင့် နည်းစနစ်အရဆိုရင် လက်ရှိအချိန်အထိ စစ်ဖြစ်နေဆဲဖြစ်ပါတယ်။
ဘာသာပြန် - ဝေမိုး
Source by : The Nation Voice