စစ်မိန့်သံအောက် သတင်းမီဒီယာ လက်နက်

စိုင်းအောင် | တစ်ချိန်က ကမ္ဘာကြီးကို ကိုင်လှုပ်ခဲ့သည့် ဖက်ဆစ်ဂျာမဏီ အာဏာရှင်ခေါင်းဆောင်ကြီး အဒေါ့ဖ်ဟစ် တလာ၏ အဆိုအမိန့်တစ်ခုကို သတိရကြလိမ့်မည်ထင်သည်။ ဒါကတော့ “လိမ်စရာရှိရင် ကြီးကြီးကျယ်ကျယ်လိမ်လိုက် ယုံသွားလိမ့်မယ်(သို့မဟုတ်) ယုံအောင်သာလိမ်လိုက်” ဟုဆိုသည်။

သွားလေသူဖက်ဆစ် အာဏာရှင်ဟစ်တလာပြောခဲ့သည့် မှတ်သားဖွယ် အဆိုအမိန့်ကို တိုင်းပြည် အာဏာ ထိန်းချုပ်ထားသည့် ယနေ့ ဗမာစစ်ဗိုလ်ချုပ်များ အတော် သဘောတွေ့မနောခွေ့ နေပုံရသည်။ ထိုနည်းအတိုင်း လိုက်နာကျင့်သုံးနေသည်ကို တွေ့ရသည်။

လူထုအတွင်း နည်းမျိုးစုံအကျိုးသက်ရောက်မှုရှိသည့် ပြည်တွင်းရှိ လူထုဆက်သွယ်ရေး မီဒီယာလုပ်ငန်းများ အပေါ် ဗမာစစ်ဗိုလ်ချုပ်များ မည်သို့သဘောထားသနည်းဟုမေးလျှင် (အားမနာစတမ်းပြောပါက) ဗမာစစ်ဗိုလ် အုပ်စု အာဏာမြဲနေသည့်အဓိက အကြောင်းအချက်တစ်ရပ်မှာ လိမ်ညာမှုကျွမ်းကျင်ခြင်းကြောင့်ဟု ဆိုလိုက်ချင် ပါသည်။

ထို့ကြောင့်လည်း တိုင်းပြည်တစ်ခု၏အသက်ယန္တရားဖြစ်သည့် ဥပဒေပြုရေး၊ တရားစီရင်ရေး ၊ စီမံအုပ်ချုပ် ခန့်ခွဲရေး မိဏ္ဏိုင်ကြီး (၃)ရပ်ရှိသည်ဆိုသည့် အချက်အပြင် နအဖခေတ်အဘို့ မိုးလုံးပြည့်မုသာဝါဒမဏ္ဏိုင်ကိုပါ ထည့်သွင်းရမလိုဖြစ်နေပါသည်။

ဗမာစစ်အာဏာပိုင်တွေ အတွက်တော့၎င်းတို့အပေါ် နိုင်ငံတကာနှင့်ပြည်သူတစ်ရပ်လုံးက “တကယ့်လူကောင်း တွေပဲ၊ကောင်းတာတွေချည်းတချိန်လုံး လုပ်နေတယ်” ဟုထင်မြင်လာစေရေးမှာ လွန်စွာအရေးကြီးသည် မဟုတ်ပါလား။

လူအပေါင်း အကောင်းမြင်သဘောထားရှိရေးစေအတွက် ပုံရိပ်ကောင်းများ ဖေါ်ဆောင်ရန် အာဏာ လောင်းရိပ် အောက်တင်းကြပ်စွာ ကိုင်တွယ်ထိန်းချုပ်ထားသည့် သတင်းမီဒီယာလုပ်ငန်းများဖြစ်သည့် စာပေ ဂီတ ရုပ်ရှင် အနုပညာ လောကတစ်ခုလုံးက စစ်ဗိုလ်ချုပ်များ၏ အကောင်းတကာ့အကောင်းဆုံး ပုံရိပ်များကို လံကြုပ် ဖေါ်ပြနေရသည်။

ဤနည်းဖြင့် စစ်ဗိုလ်အုပ်စုက ပြည်တွင်းသတင်းမီဒီယာ တစ်ခုလုံးအပေါ် တစ်ချက်လွတ်အမိန့်ဖြင့် ထိန်းချုပ် ထားပြီး ပြည်ပမီဒီယာများမှ တင်ပြနေကြသည့် ဖြစ်ရပ်မှန် သတင်းအချက်အလက်များ လူထုအတွင်း မရောက် ရှိစေရန် နည်းမျိုးစုံပိတ်ပင်တားဆီးနေခြင်းဖြစ်သည်။

ယနေ့အချိန်သည် မီဒီယာနှင့်ပတ်သက်၍ ဗမာစစ်ဗိုလ်များ အရှိန်အဟုန်မြှင့်တင် ဆောင်ရွက်လာချိန်ဖြစ်သဖြင့် အောက်ခြေ၀န်ထမ်းမိသားစုများမှအစ အထက်အရာရှိ ကြီးများအထိ ပြင်ပမီဒီယာသမားများနှင့် အဆက် အသွယ်မလုပ်ကြရန်အထူးတင်းကြပ်ခံထားရသည်။ အခြားတစ်ဘက်၌ ၄င်းတို့ပိုင်သတင်းမီဒီယာများက စစ်ဗိုလ်ချုပ်ကြီးများ၏ ပုံရိပ်ကောင်းများပြည်သူလူထုအတွင်းအစဉ်လွမ်းမိုးနေစေရန် ၀ါဒဖြန့်ရေးသား နေကြသည်။

ယနေ့နအဖ လုပ်ရပ်များသည် ကုမဏြီတစ်ခုက စားသုံးသူများအား ဆင်တူရိုးမှား ကုန်အမှတ်တံဆိပ်အတုဖြင့် လိမ်လည်ရောင်းချသည့် သာဓကနှင့်အလားတူနေသည်။

စားသုံးသူများ ဆင်တူရိုးမှားအတုအပများနှင့် ထင်ယောင်ထင်မှားမဖြစ်စေရန် သတိပေးသည့် ကုန်အမှတ် တံဆိပ် များကိုလူတိုင်းတွေ့ဘူးကြပါလိမ့်မည်။ နံမည်ကြီးကုမ္ပဏီတစ်ခု၏ ကုန် အမှတ်တံဆိပ်နှင့် ဆင်တူရိုးမှား အမည်ပေး လိမ်လည်ရောင်းချသည့် ကုန်ပစ္စည်းများကိုလည်း သတိပြုမိကြလိမ့်မည် ထင်ပါသည်။

ကမ္ဘာ့ကုလသမဂ္ဂလူ့အခွင့်အရေးကိုယ်စားလှယ် မစ္စတာကွင်တားနား မြန်မာပြည်သို့ရောက်ရှိခဲ့ပြီး မကြာမီမှာပင် လူ့အခွင့်အရေးကိုမိမိတို့ကာကွယ် မြှင့်တင်နေပါပြီဟု စစ်အုပ်စုအာဘော်သတင်းစာများက ရေးသား ဖေါ်ပြ ခဲ့ကြသည်။

သို့သော် မိမိပေးသည့် ကတိကို အကြိမ်ဖန်များစွာ ချိုးဖေါက်ခဲ့သည့် ဗမာစစ်ဗိုလ်ချုပ်များ၏ အဆိုပါ ဖေါ်ပြ ချက်မှာ ကမ္ဘာ့ကုလသမဂ္ဂမှထုတ်ပြန်ထားသော ၁၉၄၈ နိုင်ငံတကာ လူ့အခွင့်အရေးကြေငြာစာတမ်းပါ အချက်များထဲမှ အခြေခံအကျဆုံး ဖြစ်သည့် အသက်ရှင်ရပ်တည်ပိုင်ခွင့်နှင့် နေထိုင်စားသောက်ပိုင်ခွင့်ပင် မြန်မာပြည်သူများ ပြည့်ဝစွာမခံစားရသေးပေ။ လူ့အခွင့်အရေးကို ကာကွယ်မြှင့်တင်နေသည်ဆိုခြင်းကား ယုံတမ်းစကားဖြစ်နေမည်မှာက သေချာသည်။

စစ်ဗိုလ်ချုပ်ကြီးများအား ဒီမိုကရေစီနှင့်လူ့အခွင့်အရေးအခြေအနေတိုးတက်စေရန် ပြုပြင် ပြောင်းလဲရေး ပြုလုပ်ပါ ဆိုသည့်အဖက်ဖက် တိုက်တွန်းချက်အပေါ် ၄င်းတို့ကလည်း ပြောင်းလဲရေးရှေးရှုနေပြီဟု ထင်ယောင် ထင်မှား ဖြစ်စေရန်အပေါ်ယံနှမ်းဖြူးသည့် ဆင်တူရိုးမှား လုပ်ရပ်ကိုစစ်အုပ်စု ခပ်စိပ်စိပ်လေး လုပ်ပြလာ နေကြောင်း သတိထားမိသည်။

UN အကြီးအကဲဗန်ခီမွန်းအပါအ၀င် နိုင်ငံရေးအကျဉ်းသားအားလုံးချင်းချက်မရှိ ပြန်လွတ်ပေးပါဟု တောင်းဆို ကြသည့် အသံများ ခေတ္တမျှတိတ်သွားစေရန် နိုင်ငံရေး အကျဉ်းသား၂၀ ခန့်အား ရာဇ၀တ်အကျဉ်းသား (၆၀၀၀) ကျော်နှင့် အတူရော၍လွတ်ပေးလိုက်ခြင်းအပေါ် အချို့က စုပ်သပ်ညည်းတွားကြသော်လည်း တစ်ယောက်မှ မလွတ်တာထက် ကောင်းပါသည်ဟု အမြင်ရှိလျှင်ပင်စစ်အုပ်စုအတွက်နိုင်ငံရေးအမြတ်ဖြစ်သည်။

“အားလုံးကို အခုချက်ခြင်းလွတ်ပေးလိုက်လျင် စစ်ဗိုလ်ချုပ်များ၏ပုံရိပ် ဒီ့ထက်အများကြီးပိုကောင်းလာမည်။ ထို့ထက်မက နိုင်ငံရေးအကျဉ်းသားအားလုံးလွတ်ပေးပြီး အင်အားစုအသီးသီးနှင့် တွေ့ဆုံဆွေးနွေးရေး လုပ်ခဲ့မည် ဆိုပါက ပုံရိပ်ကောင်းများဖြစ်ပေါ်လာစေရန် အပင်ပန်းခံ ဖန်တီးနေစရာပင် လိုတော့မည် မဟုတ်-” ဆိုသည်ကို စစ်အုပ်စု မသိ၍မဟုတ်။ သို့သော်မိမိတို့၏ ရေရှည်လုံခြုံရေးအတွက် အလွန်စိုးရွံ့ကြသောကြောင့် စစ်အုပ်စုအဖို့ ပုံရိပ်ကောင်းသည် နည်းဗျူဟာ၊အာဏာတည်မြဲရေးသည်မဟာဗျူဟာသာဖြစ်သည်။

စစ်အုပ်စု၏အဖြစ်မှန်ပုံရိပ်ဆိုး သတင်းများကို နအဖပိုင် သတင်းမီဒီယာများ လုံးဝအမှောင်ချထားသော်လည်း တကယ့်ပုံရိပ်အစစ်အမှန်များကိုတော့ ပြည်သူလူထုက အလိုလို သိရှိနေသည်။

ယနေ့မျက်မှောက်ကာလအဖို့-လမ်းတွေဖေါက်သည် တံတားတွေဆောက်သည်ဟူသော စာလုံးမဲကြီးများဖြင့် ဖေါ်ပြထားတိုင်း ကောင်းလေစွ ဟုသာဓုခေါ်ကြသူများ လက်ညှိုးရေတွက်၍ ရသည်။ တိုင်းပြည် အာဏာ လုယူထားသည့် အစိုးရတရပ်၏ တာဝန်ကိုရေးကြီးခွင်ကျယ်လုပ်စရာမလိုဟု ပြည်သူအများ နားလည် ထားကြသောကြောင့်ဖြစ်သည်။

စစ်ဗိုလ်ချုပ်များ လမ်းဖေါက် တံတားဆောက်သည့်သတင်း၏ နောက်ကွယ်မှ ပုံရိပ်အစစ်အမှန်များကား- လမ်းပန်း ဆက်သွယ်ရေး မကောင်းသဖြင့် ကုန်ဈေးနူန်းကြီးမြင့်ခြင်း၊ ယာဉ်တိုက်မှု မကြာခဏဖြစ်ပွားခြင်း၊ လိုရာခရီးသို့ ရက်ပေါင်း များစွာ သွားလာနေရခြင်း၊ အဓမ္မ လုပ်အားပေးခိုင်းစေခြင်း- စသည်များ အဆက်မပြတ် ထင်ဟပ်ပြောပြနေကြသည်။

ရေအားလျှပ်စစ်စီမံကိန်းများ တစ်ခုပြီးတစ်ခုအကောင်အထည်ဖေါ်နေသည်ဟုစစ်အုပ်စုဝါဒဖြန့်နေသည်။ သို့သော် မြို့ကြီးအတော်တော် များများတွင် ကိုယ်ပိုင်မီးစက်များဝယ်သုံးနေရ၏။ ဖရောင်းတိုင်မီး၊ ရေဆံ နီမီးခွက်မီးကြောင့် မီးလောင်မှုများမကြာခဏဖြစ်ပွား၏။ တိုင်းပြည်ကြီး မည်သည့်ခေတ် အခါနှင့်မှ မတူအောင် တိုးတက်လာပြီဟု စစ်အုပ်စု ၀ါဒဖြန့်နေသော်လည်း စားဝတ်နေရေးကြပ်တည်းခက်ခဲလွန်းသဖြင့် နိုင်ငံခြားထွက် အလုပ်လုပ်သူတစထက်တစ များပြားလာခဲ့သည်။ သမုဒ္ဒရာဝမ်းတထွာ အတွက်ရေကြည်ရာ ရှာသူများအား စစ်အုပ်စုက သူတောင်းစား၊ လူဆိုး၊ သူခိုးဓါးပြ၊သူပုန်ပြည်ပြေးအဖျက်သမားဟု တံဆိပ်ကပ်စွပ်စွဲပြန်သည်။

မိမိတို့လုပ်ရပ်အပေါ်တကမ္ဘာလုံးအကောင်းမြင် စေရမည်ဆိုသည့် ဗမာစစ်ဗိုလ်ချုပ်များ၏ ကြွေးကြော်ချက်အရ ရုပ်ရှင်ဇါတ်ဝင်ခန်းများ၌ ဆင်းရဲသားအခန်းများ မရိုက်ကူးကြရန် မြန်မာ့ရုပ်ရှင်လောကသားတို့ တားမြစ်ပိတ်ပင် ခြင်းခံလိုက်ရသည်။

လက်စသတ်လိုက်လျှင် ဗမာစစ်ဗိုလ်ချုပ်များအဖို့မီဒီယာတိုက်ပွဲ အနိုင်ရရှိရေးအတွက် ဂျာမဏီ နာဇီ ဟစ်တလာ၏ အဆိုအမိန့်အတိုင်း အကြီးအကျယ်လိမ်လည် အယုံသွင်းနေခြင်းဖြစ်၏။ မီဒီယာ လက်နက်ကို အစွမ်းထက်မြက်စွာ အသုံးချပြီး မုသားအဖုံဖုံဖြင့်လွမ်းခြုံနေခြင်းသာဖြစ်သည်။ သို့သော် စစ်ပွဲ အကန့်အသတ် ရှိနိုင်-မရှိနိုင် ဆိုသည်မှာ ခေတ်ကာလဒေသ အခြေအနေအပေါ်မူတည်၏။ ဖက်ဆစ်ဂျာမဏီခေတ်နှင့် ပြောင်းပြန် IT ခေတ် Globalization ခေတ်၌ဟစ်တလာနည်းနာအတိုင်း စစ်အုပ်စု ဇွတ်အတင်း လိမ်လည် နေပြန်သည်။ ဆင်သေကို ကြွက်သားရေဖြင့် ဖုံးနေသောတတ်လည်းတတ်နိုင်လွန်းသည့် ဗမာစစ်အုပ်စု ပါတကား။

သို့သော် စစ်မိန့်သံအောက်မီဒီယာလက်နက်- ရေရှည်ထက်မြက်ဘွယ်မမြင်။

sourxe by : http://www.mongloi.org/burmese/index.php?option=com_content&view=article&id=357:2009-03-04-03-07-27&catid=2008-08-01-03-23-29&Itemid=266