မျိုးဆက်သစ် လူငယ်များအစည်းအရုံး (Generation Wave) နှင့် Freedom Fighter အဖွဲ့မှ ကျောင်းသူ ကျောင်းသားများနှင့် နအဖ၏ ဖမ်းဆီးထိန်းသိမ်း ခြင်းခံနေရသူများ၏ မိသားစုဝင်များ ပူးပေါင်းကာ ယနေ့ကျရောက်သည့် ဗိုလ်ချုပ်အောင်ဆန်းမွေးနေ့ အထိမ်းအမှတ်နှင့် နိုင်ငံရေးအကျဉ်းသားအားလုံး လွတ်မြောက်ရေးအတွက် ရန်ကုန်မြို့ရှိ စေတီ ပုထိုးများတွင် ဖယောင်းတိုင်ထွန်းညှိ ဆုတောင်းပွဲ ပြုလုပ်သည်။
“ဒီနေ့ဟာ ဗိုလ်ချုပ်အောင်ဆန်းရဲ့ မွေးနေ့ဖြစ်တယ်။ (၉၃) နှစ်မြောက် မွေးနေ့ဖြစ်တယ်။ ဒါကို အစိုးရက လုံးဝဖော်ပြ အသိမှတ်ပြုထားခြင်း မရှိဘူး။ ရာဇ၀င်မှာ မှေးမှိန်သွားအောင် လုပ်နေတယ်။ဒါကို ကျနော်တို့က မကျေနပ်လို့ ဗိုလ်ချုပ်မွေးနေ့ကို ဆုတောင်းတဲ့အနေနဲ့ ဘုရားမှာ ဆီမီးပူဇော် ကန်တော့တာပါ။ နောက် စက်တင်ဘာတော်လှန်ရေးကို
စစ်အစိုးရက အကြမ်းဖက် နှိမ်နင်းပြီးတဲ့နောက်ပိုင်းမှာ အဖမ်းဆီးခံထားရတဲ့ နိုင်ငံရေးအကျဉ်သားတွေ လွတ်မြောက်ဖို့ အတွက် သူတို့ရဲ့ မိသားစုဝင်တွေကို ကျနော်တို့က ဖိတ်ကြားပြီး သူတို့တွေလာရောက် ဆုတောင်းတာကို ကျနော်တို့က အရန်အင်အားအနေနဲ့ ပူးပေါင်းပါဝင်ကြတာပါ” ဟု GW အဖွဲ့ဝင်တဦးဖြစ်သူ ကိုကျော်ကျော်က ပြောသည်။
အဖမ်းဆီးခံ နိုင်ငံရေးအကျဉ်းသားများ၏ မိသားစုဝင်များက ရွှေတိဂုံ၊ မယ်လမု၊ ဗိုလ်တထောင်၊ ကမ္ဘာအေး စသည့်တန်ခိုးကြီးဘုရားများတွင် အဖွဲ့များခွဲ၍ ဆုတောင်းပွဲများပြုလုပ်ကြောင်း သိရသည်။
“ကျနော်တို့အဖွဲ့ကတော့ ရွှေတိဂုံဘုရားသွားတယ်၊ ထောင့်ရှစ်ထောင့်စလုံးမှာပေါ့။ ဖယောင်း တိုင်တွေ ထွန်းဆုတောင်းကြတယ်။ အဖမ်းအဆီးတော့မရှိဘူး။ ရွှေတိဂုံဖြစ်နေလို့ စောင့်ကြည့် တာမျိုးတော့ ရှိပါတယ်” ဟု ကိုကျော်ကျော်က ပြောသည်။
ထို့အပြင် ယနေ့မနက်ပိုင်း (၈) နာရီနှင့် (၁၀) နာရီအတွင်း၌လည်း လှည်းတန်းဦးထွန်းလင်း ခြံလမ်းတွင် GW အဖွဲ့နဲ့ Freedom Fighter အဖွဲ့တို့ ပူးပေါင်းပြီး ဗိုလ်ချုပ်ပုံပါသည့် လက်ကမ်း စာစောင်များကို ဝေငှကြောင်း သိရသည်။
ခေတ်ပြိုင် သတင်း ဋ္ဌာန မှ
Tags
သတင်း