မြန်မာ့အရေး ဦးဆောင်မှုပေးရန် အာဆီယံကို တိုက်တွန်း

ဘန်ကောက် - မြန်မာနိုင်ငံတွင် ထိရောက်သော အပြောင်းအလဲများ ဖြစ်ပေါ်ရေးအတွက် အာဆီယံသည် အပြုသဘောနှင့် ဦးဆောင်မှု အခန်းကဏ္ဍမှ ပါဝင်နိုင်သည်ဟု ထင်ရှားသော အမေရိကန် ကိုယ်စားလှယ် တဦးက သံတမန် စကားလုံးများဖြင့် ထုံမွှန်းထားသော သူ့မိန့်ခွန်းတွင် ထည့်သွင်း ပြောကြားသွားသည်။

ထိုင်းနိုင်ငံ မြို့တော် ဘန်ကောက်ရှိ ချူလာလောင်ကွန် တက္ကသိုလ်တွင် ကျင်းပသော ဆွေးနွေးပွဲ တရပ်၌ အမေရိကန် အရှေ့အာရှနှင့် ပစိဖိတ်ရေးရာ လက်ထောက် နိုင်ငံခြားရေးဝန်ကြီး သံတမန် မစ္စတာ ခရစ်စတိုဖာ ဟီးလ်က မြန်မာနိုင်ငံ၏ ကိုလိုနီအမွေနှင့် ကွဲပြားထင်ရှားသော သမိုင်းကို အသိအမှတ်ပြု လက်ခံပြီး “မြန်မာနိုင်ငံသည် နိုင်ငံတကာ၏ ကြိုးပန်း ဆောင်ရွက်ချက်များကို တုံ့ပြန်ဆောင်ရွက်ရန် မကြိုးစားပါက မြန်မာနိုင်ငံ၏ အနာဂါတ်မှာ မှေးမှိန်နေလိမ့်မည်” ဟု သတိပေးစကား ပြောကြားသွားသည်။

အဆိုပါ ဆွေးနွေးပွဲကို တက္ကသိုလ် ပရဝုဏ်တွင် “အရှေ့တောင်အာရှ၊ ထိုင်းနိုင်ငံတို့နှင့် အမေရိကန်နိုင်ငံ ဆက်ဆံရေး အမြင်များ” ခေါင်းစဉ်ဖြင့် ကျင်းပ ပြုလုပ်ခဲ့ခြင်း ဖြစ်သည်။

အာဆီယံကို မစ္စတာဟီးလ်က ဒေသတွင်း ဖွဲ့စည်း တည်ဆောက်မှု၏ အောင်မြင်မှု ဥပမာတရပ်အဖြစ် ရှုမြင်ထားပြီး လူတိုင်းအတွက် ရှေ့ဆက်သွားရမည့် ခရီးတွင် အကောင်းဆုံး နည်းလမ်းမှာ အာဆီယံအနေဖြင့် မြန်မာနိုင်ငံနှင့် ဆက်ဆံရာတွင် “ကြံ့ကြံ့ခိုင်ခိုင် ရပ်တည်ရန်” လိုကြောင်းလည်း သူ့အမြင်ကို ဆက်လက် ထိန်းသိမ်း ပြောကြားသွားသည်။ အာဆီယံ အနေဖြင့် “ဒီမိုကရေစီနှင့် လူ့အခွင့်အရေးဆိုင်ရာ စံများ ချမှတ်သတ်မှတ် ထားသင့်ကြောင်း၊ မြန်မာပြည်ကိုလည်း ထိုစံများကို ချိုးဖောက်ခွင့် မပေးသင့်ကြောင်း၊ လိုက်လျောညီထွေသာ ဖြစ်စေသင့်ကြောင်း၊ အာဆီယံသည် လက်ရှိ အခြေအနေကို ကိုင်တွယ်ရန် အကောင်းဆုံး အဖွဲ့အစည်း ဖြစ်ကြောင်း” ဖြင့် သံတမန်ကြီးက ဆက်လက် ပြောကြားသွားခဲ့ပါသည်။

ယမန်နှစ်က ချမှတ်ခဲ့သော အာဆီယံ ချာတာတွင် လူ့အခွင့်အရေးကို အစိတ်အပိုင်းတရပ် အဖြစ် ထည့်သွင်းထားခဲ့ပြီး ယင်းသည် ဒေသတွင်း လူ့အခွင့်အရေး ပြဿနာများကို ကိုင်တွယ်ရန် နည်းလမ်းတခုလည်း ဖြစ်ပြီး နေပြည်တော်မှ ပေကပ်ကပ် ဗိုလ်ချုပ်ကြီးများနှင့် ဆက်ဆံရာတွင်လည်း ထိရောက်စွာ အသုံးချနိုင်သော လက်နက်တခု ဖြစ်သည်။

မြန်မာ့အရေးသည် လူ့အခွင့်အရေး ပြဿနာတရပ် သက်သက်မျှသာ မဟုတ်၊ ပထဝီ သေနင်္ဂဗျူဟာ ပြဿနာတရပ်လည်း ဖြစ်သည် ဟု ဝါရင့်သံတမန် မစ္စတာဟီးလ်က သံတမန်စကားနှင့် ပြောကြားသွားသည်။ ယင်းသို့ ပြောဆိုရာ၌ ကုန်သွယ်ရေး ပြဿနာကို ထောက်ပြခဲ့ပြီး “အိမ်နီးချင်းနိုင်ငံသည် အခြားနိုင်ငံများထက် ပိုဆုံးရှုံးစရာ ရှိသည်” ဟုလည်း သတိပေးသွားသည်။ မြန်မာနိုင်ငံကို ဒေသတွင်း အဖွဲ့ကြီးထဲတွင်သာ ဆက်လက် ရှိနေစေချင်သည့် ဒေသတွင်း နိုင်ငံများ၏ ဆန္ဒကိုလည်း သူနားလည်နိုင်ပါကြောင်းဖြင့်လည်း ပြောကြား သွားခဲ့ပါသည်။

တရုတ်နိုင်ငံနှင့် ပတ်သက်၍လည်း ထင်ရှားသော ပြည်သူ့ဝန်ထမ်း သံတမန်ကြီးက “တရုတ်ပြည်က ပိုမို ပါဝင်ဆောင်ရွက်ပါ လို့ ပြောတာဟာ အမေရိကန်က အရင်ထက် လျှော့ပြီး ပါဝင်ဆောင်ရွက်မယ်လို့ ဆိုလိုတာ မဟုတ်ပါဘူး”၊ “အရှေ့တောင် အာရှက တရုတ်ပြည်ရဲ့ အခန်းကဏ္ဍကို ကြိုဆိုပါတယ်” ဟုလည်း ဆိုလိုက်သည်။ ထို့ပြင် မြန်မာပြည်တွင် အပြောင်းအလဲများ ဖြစ်ပေါ်ရေးအတွက် တရုတ်ပြည်နှင့် လက်တွဲ ဆောင်ရွက်မှုများ အမေရိကန်နိုင်ငံက ပြုလုပ်လျက် ရှိပါသည်ဟုလည်း ပြောဆိုသွားသည်။

မြန်မာစစ်အစိုးရကို ဘဏ္ဍရေးနှင့် စစ်ရေးအရ ထောက်ခံ ကူညီနေသည့်အတွက် တရုတ်နိုင်ငံကို မြန်မာ့အရေး စောင့်ကြည့်နေသူများနှင့် မြန်မာ့အရေး ထောက်ခံအားပေးသူ အုပ်စုများက အပြင်းအထန် ဝေဘန်နေကြသည်။

ကုလသမဂ္ဂ အထူးကိုယ်စားလှယ် မစ္စတာ ဂမ်ဘာရီ၏ လုပ်ငန်းများ အောင်မြင်မှုမရှိဟု ပြောရန်ကိုမူ သူက ငြင်းဆိုသွားသည်။ မစ္စတာ ဂမ်ဘာရီ၏ အရည်အချင်းများကို သူက ဂုဏ်ပြု ပြောဆိုလိုက်ပြီး သူ့တာဝန် ဝတ္တရားများ အောင်မြင်ရေးကို အမေရိကန် တနိုင်ငံတည်းကသာ လိုလားသည် မဟုတ်ဘဲ မစ္စတာ ဂမ်ဘာရီ၏ လုပ်ငန်းတာဝန်များ အောင်မြင်ရေးသည် မြန်မာဗိုလ်ချုပ်ကြီးများ၏ အကျိုးစီးပွါး အတွက်လည်း ဖြစ်သင့်ကြောင်း ဤကဲ့သို့သော အရည်အချင်းများ ရှိသည့် သံတမန်ကြီးကို နိုင်ငံရေး စင်မြင့်မှ ထွက်ခွါသွားစေခြင်းမျိုး မလုပ်အပ်ကြောင်းဖြင့်လည်း ဆိုလိုက်ပါသည်။

ဆင်းရဲမှုလျော့ပါးရေး ကော်မတီ ဖွဲ့စည်းရေးကို အသာထား၍ မေလတွင် ပြည်လုံးကျွတ် ဆန္ဒခံယူပွဲများ မကျင်းပမီ အမျိုးသား ပြန်လည် သင့်မြတ်ရေးနှင့် ဖွဲ့စည်းပုံ ရေးဆွဲရေး ဖြစ်စဉ်များတွင် အားလုံး ပါဝင်နိုင်ရေးအတွက် မစ္စတာ ဂမ်ဘာရီ၏ မေတ္တာရပ်ခံချက်များ အားလုံးကို စစ်အစိုးရက မသိကျိုးကျွန် ပြုနေချိန်တွင် အထူး သံတမန်ကြီး၏ လုပ်ငန်းများ အားလုံး ရှုံးနိမ့်ကျဆုံးသွားပြီ ဟု ပြောဆိုသံများ ပိုမို ကျယ်လောင် ပျံ့ နှံ့လာနေသည်။

မြန်မာဗိုလ်ချုပ်ကြီးများနှင့် ထိပ်တိုက်ရင်ဆိုင်ရာတွင် နိုင်ငံတကာ၏ ချဉ်းကပ်မှုတွင် အကြီးအကျယ် အငြင်းပွါးရသော ပိတ်ဆို့ အရေးယူရေးကို အချေအတင် ဆွေးနွေးရာတွင် သံတမန်ကြီးက ဤ ပိတ်ဆို့ အရေးယူမှု ဆိုသည်မှာ “ဘယ်သူမှ ပထမ ဦးစားပေး ရွေးချယ်ခြင်း” မဟုတ်ကြောင်း၊ ဤအရေးယူမှု မအောင်မြင်ရခြင်းမှာ နိုင်ငံတကာ အသိုင်းအဝိုင်း၏ အချို့သော အဖွဲ့ဝင်များက စည်းကမ်းချက်များကို တညီတညာတည်း မလိုက်နာခဲ့၍ ဖြစ်ကြောင်းဖြင့် ကာကွယ် ပြောကြားသွားသည်။ “ပိတ်ဆို့ အရေးယူမှု ဆိုသည်မှာ အမြဲတမ်း အလုပ်ဖြစ်လေ့ မရှိကြောင်း၊ အောင်မြင်မှုနှင့် ဆုံးရှုံးမှု ရောနှောနေသည်သာ ဖြစ်ကြောင်း” ဖြင့်လည်း တက်ရောက်လာသူများကို ဆက်လက် ပြောဆိုသွားသည်။

သို့သော် စစ်အစိုးရနှင့် ယင်း၏ အရပ်သား အပေါင်းပါများကို ပစ်မှတ်ထား ရွေးချယ် အရေးယူသည့် အမေရိကန်၏ ပိတ်ဆို့ အရေးယူမှုများကိုမူ နောက်ပြန်ဆုတ်လိမ့်မည် မဟုတ်ကြောင်းလည်း ပြောကြားသွားသည်။

မစ္စတာဟီးလ်၏ အဆိုအရ အာဆီယံနှင့် အာရှဒေသတွင်း၌ မြန်မာနိုင်ငံ၏ ရပ်တည်ချက် အနေအထားအပေါ် နောက်ထပ်လေးစား လိုက်နာမှု ရှိလာစေရန် မြန်မာနိုင်ငံနှင့် ဆက်သွယ် ဆောင်ရွက် လုပ်ကိုင်ရာတွင် “အကန့်အသတ်ရှိသော လက်နက် ကိရိယာများ” လက်တကမ်း အကွာတွင် အလွယ်တကူ ရှိနေရေးမှာ အမေရိကန် ပြည်ထောင်စုအတွက် အရေးပါလှသည် ဟု ဆိုသည်။

သံတမန်ကြီး မစ္စတာဟီးလ်ကို မြောက်ကိုရီးယား၏ နယူကလီယား လက်နက်များ ပြဿနာ ဖြေရှင်းရေးအတွက် ၆ ပါတီ ဆွေးနွေးပွဲများတွင် ပါဝင် ဆောင်ရွက်ခဲ့ခြင်းအတွက် လူသိများသည်။

မည်သို့ပင်ဖြစ်စေ မြောက်ကိုရီးယား၏ လုံခြုံရေး ဆိုင်ရာ ခြိမ်းခြောက်မှုများကို မြန်မာနိုင်ငံနှင့် နိုင်ငံတကာ အသိုင်းအဝိုင်းအကြား ဆက်ဆံရေးနှင့် တတန်းတည်းထား၍ မူမရနိုင်ကြောင်းဖြင့်လည်း သူက ဆက်လက် ပြောဆိုလိုက်သည်။ သို့သော် မြန်မာ့ ပြဿနာ ဖြေရှင်းနိုင်ရေးအတွက် တွေ့ဆုံ ဆွေးနွေးမှုများ ပေါ်ပေါက်လာရန် ကြိုးပမ်းနေကြသော နိုင်ငံများ အားလုံးနှင့် စပ်လျဉ်း၍လည်း သူကအကောင်း မြင်လျက်ပင် ရှိပါသည်ဟု ဆိုသည်။

အမေရိကန် ပြည်ထောင်စု၏ ကာလရှည်ကြာစွာ ကိုင်စွဲထားခဲ့သော ရပ်တည်ချက် တရပ်မှာ နိုင်ငံရေး အကျဉ်းသားများ အားလုံး လွှတ်ပေးရေး၊ အမည်တပ်၍ ပြောရမည်ဆိုလျှင် အတိုက်အခံ ခေါင်းဆောင် ဒေါ်အောင်ဆန်းစုကြည်ကို လွှတ်ပေးရေး ဖြစ်သည်။


ခရစ်စတိုဖာ စမစ် မဇ္ဈိမသတင်းဌာန
Friday, 29 February 2008 23:28 - မြန်မာစံတော်ချိန်