နိုင်ငံရေး အကျဉ်းသား ဟောင်းများ၏ သဘောထား ကြေညာချက်

(ဟံသာဝတီ ဦးဝင်းတင်ကို ဝန်းရံကြ)

စစ်အာဏာရှင်တို့၏ ၂၀၁၀ ရွေးကောက်ပွဲနှင့် သက်ဆိုင်သော ဥပဒေ၊ နည်းဥပဒေများ ထွက်ရှိလာခဲ့ပြီ ဖြစ်သည်။ ရွေးကောက်ပွဲကော်မရှင် ဖွဲ့စည်းခြင်းမှစ၍ ထွက်လာသမျှ ဥပဒေ၊ နည်းဥပဒေများသည် စစ်ဝါဒီတို့၏ တစ်ဖက်သတ် ထင်ရာစိုင်း ရေှးဆွဲထားကြောင်း ထင်ထင်ရှားရှား ပေါ်လွင်နေသည်ကို ကမ္ဘာကပင် သိရှိနေခဲ့ကြပေပြီ။ ပါတီ မှတ်ပုံတင်ခြင်း ဥပဒေတွင်ပင် ____

၁။ ပြစ်ဒဏ် ကျခံနေရသူများကို ပါတီဝင် အဖြစ် မထားရခြင်း။
၂။ မှတ်ပုံတင်ခွင့် လျှောက်ထားသူ (၁၅) ဦးလုံးက၊ တစ်ဦးချင်း ၂၀၀၈ ဖွဲ့စည်းပုံ အခြေခံဥပဒေကို ထိန်းသိမ်း စောင့်ရှောက် ပါမည်ဟု ဝန်ခံကတိ လက်မှတ် ရေးထိုးရခြင်း။
၃။ ရွေးကောက်ပွဲတွင် အနည်းဆုံး အမတ်နေရာ (၃) နေရာ မဝင်မဖြစ် ဝင်ရခြင်း။ စသည့် အချက်များသည် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများကို မြန်မာနိုင်ငံ၏ နိုင်ငံရေး အခန်းကဏ္ဍမှ ဖယ်ရှားလိုက်ခြင်း ဖြစ်ကြောင်း ထင်ရှားနေပေသည်။

ထိုသို့သော အခြေအနေဆိုးတွင် အဓိက နိုင်ငံရေး ဦးဆောင် ပါတီကြီးဖြစ်သော ၁၉၉၀ ခုနှစ် ရွေးကောက်ပွဲ၏ အနိုင်ရ NLD ပါတီ တွင် ပါတီမှတ်ပုံတင်ရေးနှင့် ပတ်သက်၍ သဘောထား ကွဲလွဲမှုများ မလိုအပ်ဘဲ ဖြစ်ပေါ်လာသည် ကို စိတ်ပျက်ဖွယ် သိရှိလာရသည်။

NLD သည် ၁၉၉၃ ခုနှစ်မှ စတင်ခဲ့သော အခြေခံဥပဒေ ပေါ်ပေါက်ရေး အကြောင်းပြ နအဖ၏ အမျိုးသား ညီလာခံကို ဆန့်ကျင် သပိတ်မှောက် ခဲ့သည်။ ထိုအကြောင်းကြောင့် NLD မှ ရွေးချယ်ခံ ကိုယ်စားလှယ်များ မတရားဖမ်းဆီး ထောင်ချခံခဲ့ရသည်။ “တွေ့ဆုံ ဆွေးနွေးရေး’’ ဟူသော ခေါင်းစဉ်ကို နှစ်ပေါင်းများစွာ ဝတ်ကျေ တန်းကျေ ဖက်တွယ်ထားခဲ့ပြီး ကျီးနှင့်ဖုတ်ဖုတ် NLD ဌာနချုပ် ဘဝတွင် CEC တို့သည် ခွင့်ပြုချက်ရလျှင် ကြေညာချက်ထုတ်ခြင်းမှ တပါး မည်သည့် နိုင်ငံရေး လုပ်ငန်းစဉ်မှ မချမှတ်နိုင်ခဲ့ပေ။ ပါတီ တည်မြဲရေး အတွက်ဟု ဆိုကာ ဒေါ်အောင်ဆန်းစုကြည် အပါအဝင် အကျဉ်းခံ ပါတီ ခေါင်းဆောင်များအား ပါတီမှ ထုတ်ပယ်ခြင်း ကိုပင် အရှက်မဲ့စွာ ပြုလုပ်ခဲ့သေးသည်။ ရွှေဝါရောင် တော်လှန်ရေးတွင်လည်း NLD CEC တို့ မသိကျိုးကျွံ တာဝန်မဲ့ ပြုခဲ့ကြပြန်သည်။

၂၀၀၈ နအဖ၏ စစ်ကျွန်ဇာတ်သွင်းသည့် ဖွဲ့စည်းပုံကို တဖက်သတ် အတည်ပြုလိုက်ပြီးသောအခါ ၌လည်း “ရွှေဂုံတိုင် ကြေညာစာတမ်း” ဟု ထုတ်ပြန်ရုံသာရှိခဲ့ပြီး ၎င်းတို့၏ သတ်မှတ်ကာလကျော်လွန်သည့် တိုင်အောင် တိကျသော နိုင်ငံရေးလမ်းစဉ်ဖြင့် မတုန့်ပြန်နိုင်ခဲ့ချေ။

၁၉၈၈(၈၈၈၈) အရေးတော်ပုံသည် ရဟန်းရှင်လူ၊ ကျောင်းးသား၊ ပြည်သူတို့၏ အသက်ပေါင်းများစွာ စတေးခဲ့ရပြီးမှ မဆလ တပါတီ အာဏာရှင်တို့ ကျဆုံးခဲ့ရသော ပြည်သူ့အောင်ပွဲတရပ်ဖြစ်သည်။ ထိုအောင်ပွဲ၏ အသီးအပွင့်အဖြစ် ပေါ်ထွက်လာခဲ့သော နိုင်ငံရေး ပါတီ များထဲမှ လူထုခေါင်းဆောင် ဒေါ်အောင်ဆန်းကြည် ဦးဆောင်သော NLD ပါတီကို ၁၉၉၀ ရွေးကောက်ပွဲတွင် ပြည်သူ လူထုက ပြတ်ပြတ်သား ရွေးချယ်မဲဆန္ဒပေးခဲ့ဖြင့် အနိုင်ရပါတီအဖြစ် ရပ်တည်လာနိုင်ခဲ့သည်။ ထို့ကြောင့် ပြည်သူလူထု၏ ဆန္ဒကို အဓိကထား ရပေမည်။ ၈၈၈၈ အရေးတော်ပုံ စိတ်ဓာတ်ကို မျက်ကွယ် မပြုသင့်ပါ။

ရွေးကောက်ပွဲ ဟူသော အသံ ကြားရုံဖြင့် အာသာ ငမ်းငမ်းဖြစ်ကာ ဆင်ခြင်တုံ တရားမဲ့ နေကြသည့် အချောင်သမား၊ အာဏာရူးများနှင့် တန်းတူ NLD- CEC များ မဖြစ်သင့်ပါ။ မိမိ၏ ရပ်တည်ချက်ကို သေချာစွာ ကိုင်စွဲထား သင့်ပါသည်။ ၁၉၉၀- ပြည်သူ့ဆန္ဒကို လျစ်လျူရှုရန် မကြံစည်သင့်ပါ။ ပါတီ ဆက်လက် ရပ်တည် နိုင်ရေး ဟူ၍ လည်းကောင်း၊ ဥပဒေတွင်း တိုက်ပွဲ တိုက်ရန်ဟူ၍လည်းကောင်း၊ မိမိတို့၏ အချောင်သမား စိတ်၊ အာဏာရူးစိတ်ကို မဖုံးကွယ်ပါနှင့်။ ၁၉၈၉-၁၉၉၀ ဝန်းကျင်ကတည်းက ဥပဒေတွင်း တိုက်ပွဲ တိုက်ရန် ဟူ၍ ပါတီဖွဲ့ခဲ့ခြင်း ဖြစ်ပါသည်။ ယခု အချိန်အထိ မည်သည့် ဥပဒေတွင်း တိုက်ပွဲကိုမှ NLD - CEC တို့ မတိုက်နိုင်ခဲ့ပါ။

ရန်သူ လက်တွင်း၌ မတရား ချုပ်နှောင် ခံထားရသည့် ဒေါ်အောင်ဆန်းစုကြည်ကပင် မတရား ထုတ်ပြန်ခဲ့သည့် ဥပဒေများ ဖြစ်ခြင်းကြောင့် ပါတီ မှတ်ပုံတင်ရန် သဘော မတူကြောင်း အတိအလင်း ထုတ်ဖော်ခဲ့ပြီး ဖြစ်သည်။

တဖန် NLD ခေါင်းဆောင် တစ်ဦးဖြစ်ပြီး စစ်အုပ်စုက အညှိုးကြီးစွာနှစ်ရှည်ထောင်ဒဏ်ချခံခဲ့ရသော ဒီမိုကရေစီရေးနှင့် ပြည်သူ အပေါ်သစ္စာရှိသည့် နိုင်ငံရေးအကျဉ်းသားဟောင်း ဟံသာဝတီ ဦးဝင်းတင်က_ “ပါတီမရှိလည်းနိုင်ငံရေးရှိနေဖို့က အရေးကြီးတယ်၊ ပါတီကို သံခြေကျဉ်းခတ်တဲ့ လုပ်ငန်းမျိုးကို ကျွန်တော်လက်မခံနိုင်ဘူး၊” “နိုင်ငံရေှးရှိပြီးတော့ ပါတီမရှိရင်တောင်မှ လှုပ်ရှားလို့ရတယ်၊ နိုင်ငံရေးမရှိဘဲ ပါတီရှိနေလို့ အလကားပဲ၊ ခေါင်းမရှိတဲ့လူလိုဘဲ ဖြစ်မှာဘဲ” ဟု မှန်ကန်သော အယူအဆကို ရဲရဲဝံ့ဝံ့ ရပ်တည်နိုင်မည့် လမ်းကြောင်းမှန်ပေါ်သို့ တင်လိုက်ပြီဖြစ်သည်။

ဟံသာဝတီ ဦးဝင်းတင်သည် အလွန်ဆိုးရွားလှသော အင်းစိန်ထောင်ထဲတွင် မြေးအရွယ် လူငယ်များနှင့် လက်တွဲပြီး တိုက်ပွဲ ဝင်ခဲ့သူ ဖြစ်သည်။ နိုင်ငံရေး ဆွေးနွေးပွဲများ လုပ်သည်။ နိုင်ငံရေး စာစောင်ရအောင် ထုတ်သည်။ ထောင်တွင်းမှ နေ၍ ကုလသမဂ္ဂသို့ ရောက်အောင် ‘နအဖ’၏ လူ့အခွင့်အရေး ချိုးဖောက်မှုများကို ဦးဆောင် ရေးသား ပေးပို့ခဲ့သဖြင့် နအဖ စစ်အာဏာရှင်တို့၏ အညှိုးကြီးစွာဖြင့် ထောင်ထဲတွင် နှစ်တိုး ထောင်ဒဏ် ချမှတ် ခံခဲ့ရသည်။

၂၀၀၉ ခုနှစ်တွင် နေအိမ် အကျယ်ချုပ် ကျခံနေရသော လူထု ခေါင်းဆောင် ဒေါ်အောင်ဆန်းစုကြည်ကို မတရား ပုဒ်မတပ် အရေးယူသော အခါတွင်လည်း “ပါတီ ဌာနချုပ်ထဲတွင် ငိုင်ပြီး ငိုက်မနေဘဲ အများ ပြည်သူ သဘော မတူတဲ့ အမိန့် အာဏာဟူသမျှ တာဝန်အရ ဖီဆန်ကြ” ဟူသော သူမ၏ လမ်းညွှန်ချက်ကို ဦးထိပ်ထား၍ ဟံသာဝတီ ဦးဝင်းတင်သည် မကြောက်တရား လက်နက်၊ သွေးစည်း ညီညွတ်ရေး လက်နက်၊ စစ်အာဏာရှင် စနစ် ဆန့်ကျင်ရေး ရည်မှန်းချက် ပန်းတိုင် တစ်ခုတည်း ချမှတ်၊ ရှေးရှု၊ ရင်ဆိုင် ချီတက်ရေး လက်နက် ဟူသော လက်နက် သုံးရပ်ကို ကိုင်စွဲပြီး ပြည်သူ လူထုကြားတွင် မားမားမတ်မတ် ရပ်တည်ပြီး လူထုတိုက်ပွဲကို စိန်ခေါ်ခဲ့သူ ဖြစ်သည်။ သူသည် မည်သည့် နေရာ ရောက်ရောက် တော်လှန်ရေးနှင့် နိုင်ငံရေးကို သစ္စာ မဖောက်သူ ဖြစ်သည်။

NLD ကို ပြည်သူ့ဘက်မှ ရပ်တည်သော ပါတီဖြစ်စေရန် ဟံသာဝတီ ဦးဝင်းတင်ကဲ့သို့သော ခေါင်းဆောင်မျိုးကို ရွေးချယ် ဝိုင်းဝန်းကြဖို့ အလုပ်နဲ့ သက်သေပြသင့်ပါပြီ။ အသက်ပေါင်းများစွာ ဘဝပေါင်းများစွာ ရင်းနှီးခဲ့ရသော တော်လှန်ရေး ရပ်တည်ချက်၊ ခံယူချက် အပေါ်သစ္စာရှိစွာဖြင့် နအဖ ကို ဒူးထောက်၊ မှတ်ပုံတင်သည့် အညံ့ခံ အရှုံးပေးရေး ဝါဒီ အချောင်သမားများကို နည်းလမ်း ပေါင်းစုံဖြင့် ဆန့်ကျင်သွားပြီး တော်လှန်ရေး သစ္စာဖောက်များ အဖြစ်သတ်မှတ်ကြေညာ၍ သမိုင်း တရားခံ အဖြစ် သတ်မှတ် သွားရမည် ဖြစ်သည်။ ဒီတပွဲတွင် အမျိုးသား ဒီမိုကရေစီ အဖွဲ့ချုပ်က အချောင်သမားများကို လည်းကောင်း၊ ခြစား ပျက်စီးနေသော အမတ်ရူးများကို လည်းကောင်း တိုက်ထုတ် ရှင်းလင်း ပစ်ရန် လိုပေသည်။

ပြည်သူ့မျက်နှာ မထောက်သူ တချို့သည် ၎င်းတို့ သဘောနှင့် ၎င်းတို့ ဒေါ်အောင်ဆန်းစုကြည်ကို ထုတ်ပစ်ရန်၊ ပါတီ ရပ်တည်ရေးကို အကြောင်းပြပြီး နအဖ ခိုင်းသည့် အတိုင်း လုပ်ရင်း ပါတီမှတ်ပုံတင်ရန် ကြိုးစား ကြပါတော့မည်။ သက်ဆိုင်ရာ တိုင်း၊ ပြည်နယ်၊ မြို့နယ် အသီးသီးရှိ NLD အစိတ်အပိုင်း အားလုံးက မြို့နယ် အလိုက် ရွေးကောက်ပွဲမဝင်ဘူး၊ ဒေါ်အောင်ဆန်းစုကြည်နှင့်တကွ နိုင်ငံရေး အကျဉ်းသားများ လွတ်မြောက်မှု မရှိဘဲ၊ ပါတီဝင်ခွင့် မရှိကြဘဲနှင့် မည်သည့်မြို့နယ် အစိတ်အပိုင်းကမှလည်း ပါဝင်မည် မဟုတ်ကြောင်း သေချာစွာ စုစည်း၍ NLD ရုံးချုပ်သို့ ၂၈.၃.၁၀ နေ့မတိုင်ခင် ဆန္ဒပြုပေးပို့ကြရန် လည်းကောင်း၊ ပြည်သူလူထု အပေါ် သစ္စာရှိစွာဖြင့် ရဲရဲဝံ့ဝံ့ ရပ်တည်ကြပြီး ဒီမိုကရေစီ တော်လှန်ရေး၏ သူရဲကောင်း ဟံသာဝတီ ဦးဝင်းတင်ကို ဝန်းရံ ပေးကြရန် လည်းကောင်း တိုက်တွန်းလိုပါသည်။

နအဖထံတွင် ဒူးထောက် အညံ့ခံပြီး ပါတီမှတ်ပုံတင်ကြမည့် အချောင်သမား အုပ်စုကို ဝိုင်းဝန်း ဆန့်ကျင် ကြပါရန် တိုက်တွန်းလိုပါသည်။

အထူးသဖြင့် ပြည်တွင်းရှိ NLD ရဲဘော်များအနေဖြင့် ဒေါ်အောင်ဆန်းစုကြည် ၏ သဘောထားနှင့် ဟံသာဝတီ ဦးဝင်းတင်ကို ဝန်းရံရေးတွင် တခဲနက်ပူးပေါင်းပါဝင်ပေးကြပါရန် ကျွနု်ပ်တို့ အောက်ဖော်ပြပါ နိုင်ငံရေး အကျဉ်းသားများမှ မေတ္တာရပ်ခံအပ်ပါသည်။

၁။ နအဖ၏ ၂၀၁၀ စစ်ကျွန်ပြုရွေးကောက်ပွဲကို ဆန့်ကျင်ကြ။
၂။ ဒူးထောက် အညံ့ခံပါတီ မှတ်ပုံတင်မယ့် နိုင်ငံရေးအချောင်သမားများကို တိုက်ထုတ်ကြ။
၃။ စစ်အာဏာရှင် ဆန့်ကျင်ရေး လူထုတိုက်ပွဲ ဖော်ထုတ်ကြ။
၎။ ဒေါ်အောင်ဆန်းစုကြည်၏ သဘောထားကို ထောက်ခံကြ။
၅။ ဟံသာဝတီ ဦးဝင်းတင်ကို ဝန်းရံကြ၊၊

“အရေးတော်ပုံ အောင်ရမည်။”

၁	ဦးဇဝန	အင်းစိန်ထောင်၊သာယာဝတီ၊တောင်ငူ။ (၁၉၉၃ ~ ၂၀၀၉)
၂	ဦးစန္ဒောဘာသ	အင်းစိန်ထောင်၊သာယာဝတီ။ (၁၉၉၃ ~၂၀၀၉)
၃	ဦးသောဘိတ	အင်းစိန်ထောင်၊ တောင်ငူ။ (၂၀၀၅~၂၀၀၆)
၎	ဦးကုသလ	စစ်တွေ၊ တောင်ငူ။(၁၉၉၁~၉၅)
၅	ဦးဝိသုဒ္ဓ	သာယာဝတီ၊ စစ်တွေ။(၁၉၈၈~ ၉၇)
၆	ဦးဥက္ကံသ	အင်းစိန်ထောင်၊ (၁၉၉၀ ~ ၉၃)
၇	ဦးအာစရ	အင်းစိန်ထောင်၊ သာယာဝတီ( ၁၉၉၀~၂၀၀၆)
၈	ကိုလွင်မြင့်	အင်းစိန်ထောင်၊ သရက်(၁၉၉၀ ~ ၉၈)
၉	ကိုကျော်စိုးဝင်း	အင်းစိန်ထောင်၊(၁၉၉၃ ~ ၉၈)
၁၀	ကိုလှသန်း	အင်းစိန်ထောင်၊ သရက်(၁၉၉၀-၂၀၀၄)
၁၁	ကိုသီဟ	အင်းစိန်ထောင်၊ သရက်(၁၉၉၆ ~ ၂၀၀၄)
၁၂	ကိုစောညီညီ	စစ်တွေ၊ အင်းစိန်၊ သာယာဝတီ(၁၉၉၁ ~ ၂၀၀၂)
၁၃	ကိုအောင်ပန်	မုံရွာထောင်(၁၉၈၉)
၁၄	ကိုအောင်မိုး	ပဲခူးထောင်(၁၉၉၈ ~ ၂၀၀၄)
၁၅	ကိုအောင်သန်း	အင်းစိန်၊ သာယာဝတီ( ၁၉၉၁ ~ ၂၀၀၉)
၁၆	ကိုမိုးမြင့်	အင်းစိန်ထောင်(၁၉၇၅~ / ၁၉၈၉~၉၅)
၁၇	ကိုအေးမင်းစိုး	အင်းစိန်၊ တောင်ငူထောင်(၁၉၈၈/ ၁၉၉၀ ~၉၃ )
၁၈	ကိုစိုးထိုက်	အင်းစိန်၊ သာယာဝတီ(၁၉၉၁~ ၁၉၉၉)
၁၉	မမိုးကလျာဦး	အင်းစိန်၊ သာယာဝတီ(၁၉၉၅ ~၂၀၀၁)
၂၀	ဦးဇော်ဝင်း	အင်းစိန်၊တောင်ငူ(၁၉၉၀~၉၇)
၂၁	ကိုထွန်းလင်းကျော်	အင်းစိန် (၂၀၀၄ ~၂၀၀၇)
၂၂	ကိုကြည်ဝင်း	အင်းစိန်၊သရက်(၁၉၉၄~၂၀၀၀)
၂၃	ကိုကျော်ကျော်လွင်	ကော့သောင်းထောင်၊ မြိတ်(၂၀၀၃~၂၀၀၉)
၂၄	မသန်းသန်းဆင့်	အင်းစိန်ထောင်၊(၂၀၀၅~၂၀၀၉)
၂၅	မအေးအေးမိုး	တောင်လေးလုံး(၁၉၉၈~၂၀၀၀)
၂၆	ကိုအောင်ခိုင်	အင်းစိန်၊ပုသိမ်(၁၉၉၆~၂၀၀၃)
၂၇	ကိုသီဟရာဇာ	အင်းစိန်၊ကလေး၊တောင်ကြီး၊ (၁၉၉၁~၂၀၀၉)
၂၈	ကိုတင့်လွင်(ခ)သိဂီင်္အောင်	အင်းစိန်၊သရက်(၁၉၉၀~၁၉၉၈)
၂၉	ဦးဝင်းမြင့်	အင်းစိန်၊သာယာဝတီ(၁၉၉၆~၂၀၀၅)
၃၀	ဦးဌေးလှိုင်	အင်းစိန်၊ တောင်ငူ(၂၀၀၀~၂၀၀၅)
၃၁	ကိုအောင်ငွေဆန်း	အင်းစိန်၊မြောင်းမြ(၂၀၀၀~၂၀၀၃)
၃၂	ကိုကျော်ကျော်ခိုင်	အင်းစိန်၊မြောင်းမြ(၁၉၈၈~၂၀၀၈)
၃၃	ကိုဇော်မိုးမြင့်(ခ)တရုတ်ကြီး	အင်းစိန်၊မြောင်းမြ(၁၉၉၈~၂၀၀၂)
၃၄	ဦးစံမြင့်	မော်လမြိုင်ထောင်(၂၀၀၅~၂၀၀၈)
၃၅	ကိုကျော်ကျော်ခိုင်	အင်းစိန်၊တောင်ငူ(၁၉၉၆~၉၈)
၃၆	မသန္တာဦး	အင်းစိန်ထောင်(၁၉၉၆~၂၀၀၂)
၃၇	မသင်းမင်းစိုး	အင်းစိန်ထောင်(၂၀၀၅~၂၀၀၉)
၃၈	ကိုနိုင်မင်းထွေး	အင်းစိန်ထောင်၊ မြောင်းမြ(၁၉၉၆~၂၀၀၂)
၃၉	ကိုစိုးလွင်	မြိတ်၊ အင်းစိန်၊ မော်လမြိုင်(၁၉၉၄~၂၀၀၈)
၄၀	ကိုရန်အောင်ရွှေ	အင်းစိန်ထောင်၊ သရက်(၁၉၉၉~၂၀၀၉)
၄၁	ဒေါက်တာထင်ဇော်	မန္တလေးထောင်(၁၉၉၉~၂၀၀၄)
၄၂	ကိုယဉ်ထွေး	အင်းစိန်ထောင်၊ သာယာဝတီ(၁၉၉၁~၂၀၀၀)
၄၃	ကိုတိုးအောင်	အင်းစိန်၊ မန္တလေး(၁၉၉၅~၂၀၀၅)
၄၄	ကိုစိုးနိုင်	မန္တလေး(၁၉၈၉-၉၀/၁၉၉၁-၉၂)
၄၅	ကိုမြတ်ထွန်း	အင်းစိန်၊ မြင်းခြံ(၁၉၉၁ ~ ၂၀၀၃)
၄၆	ကိုစိုးမြင့်	ထားဝယ်ထောင်(၁၉၉၀~၉၃)
၄၇	ကိုဌေးဇော်	အင်းစိန်၊ သရက်(၂၀၀၂~၂၀၀၈)
၄၈	ဦးစောသန်းလှ	အင်းစိန်၊ သရက်(၁၉၈၃~၂၀၀၆)
၄၉	ဦးသက်နိုင်	အင်းစိန်၊ မြစ်ကြီးနား(၁၉၈၉~၉၇)
၅၀	ကိုစန်းလွင်ဦး	အင်းစိန်၊ ထားဝယ်(၂၀၀၇~၂၀၀၉)