အကသ မှ ခွပ်ဒေါင်း အလံ အလွဲသုံးစား လုပ်ခြင်းအား ရှုတ်ချ ကန့်ကွက်ကြောင်း ကြေညာချက်


အခြေခံပညာကျောင်းသားများ သမဂ္ဂ
ခွပ်ဒေါင်းအလံ အလွဲသုံးစားလုပ်ခြင်းအား
ရှုတ်ချကန့်ကွက်ကြောင်းကြေညာချက် (၁/၂၀၁၀)
ရက်စွဲ။    ။ ၆.၅.၂၀၁၀


ခွပ်ဒေါင်း အလံသည် ကျောင်းသား သမဂ္ဂများ၏ တရားဝင် အလံဖြစ်သည်။

လွတ်လပ်ရေး ကြိုးပမ်းမှု ကာလ တလျှောက်လုံး ဗိုလ်ချုပ်အောင်ဆန်းတို့ ကျောင်းသား ဘ၀မှ စ၍ ကျောင်းသား သမဂ္ဂတွင် ခွပ်ဒေါင်း အလံကို သုံးစွဲခဲ့ပြီး၊ ၁၉၈၈ ခုနှစ် ရှစ်လေးလုံး အရေးတော်ပုံကြီးတွင်လည်း ခွပ်ဒေါင်း အလံလွှင့်ထူကာ ပြည်သူ လူထုကြီး တရပ်လုံးက စစ်အာဏာရှင် စနစ်ကို တိုက်ပွဲဝင်ခဲ့သည့် လူထု တိုက်ပွဲ အလံလည်း ဖြစ်သည်။

ထို့အပြင် ခွပ်ဒေါင်း အလံကို ၁၉၆၀ ခုနှစ် ဗမာ နိုင်ငံလုံး ဆိုင်ရာ ကျောင်းသား သမဂ္ဂများ အဖွဲ့ချုပ်၏ ဆဌမ အကြိမ် ကျောင်းသားများ ညီလာခံမှ ဗမာနိုင်ငံလုံး ဆိုင်ရာ ကျောင်းသားသမဂ္ဂများ အဖွဲ့ချုပ်၏ တရားဝင် အလံအဖြစ် ဆုံးဖြတ် အတည်ပြုခဲ့ပြီး ဖြစ်ပါသည်။

ထို့ကြောင့် ခွပ်ဒေါင်း အလံကို ဗမာနိုင်ငံလုံး ဆိုင်ရာ ကျောင်းသား သမဂ္ဂများ အဖွဲ့ချုပ်နှင့် အဖွဲ့ဝင်ကျောင်းသား သမဂ္ဂများ ကသာ တရားဝင် သုံးစွဲခွင့်ရှိသည်။

ကိုမင်းကိုနိုင် ဦးဆောင်သည့် ၈၈မျိုးဆက် ကျောင်းသားများ အဖွဲ့၏ အမည်ကို ဆင်တူယိုးမှား နာမည် ခိုးယူထားသည့် ဦးရဲထွန်းတို့၏ ၈၈မျိုးဆက် ကျောင်းသား လူငယ်များ (ပြည်ထောင်စု မြန်မာနိုင်ငံ)သည် ကိုယ့်ကိုယ်ကို ယုံကြည် လျှင် ကိုယ်ပိုင် အလံ၊ ကိုယ်ပိုင် တံဆိပ်တုံး တို့ကို တီထွင် အသုံးပြုနိုင် ပါသည်။ ယခုကဲ့သို့ သမိုင်းအစဉ်အလာ ကြီးမားသည့် ကျောင်းသား သမဂ္ဂများ၏ တိုက်ပွဲဝင် အလံကို ခိုးယူသုံးစွဲခြင်း လုံးဝ မပြုလုပ်သင့်ပါ။

ဦးရဲထွန်းတို့၏ အတုအယောင် ၈၈မျိုးဆက် ကျောင်းသား လူငယ်များ (ပြည်ထောင်စု မြန်မာနိုင်ငံ) ပါတီ၏ ခွပ်ဒေါင်း အလံနှင့် ခွပ်ဒေါင်း တံဆိပ်အား သူတို့၏ ပါတီ အလံနှင့် တံဆိပ် အဖြစ် သုံးစွဲရန် ကြံစည်မှုနှင့် ပြည်ထောင်စုရွေး ကောက်ပွဲ ကော်မရှင်သို့ လျှောက်ထားမှုကို အခြေခံပညာ ကျောင်းသားများ သမဂ္ဂမှ လုံးဝ(လုံးဝ) ရှုတ်ချ ကန့်ကွက် ပါသည်။

မိမိတို့၏ ရှုတ်ချ ကန့်ကွက်ခြင်းကို လက်မခံဘဲ ခွပ်ဒေါင်း အလံကို ဆက်လက် သုံးစွဲနေမည် ဆိုလျှင် ၈၈မျိုးဆက် ကျောင်းသား အမည်ခံ ဦးရဲထွန်းနှင့် အပေါင်းအပါများ အားလုံးသည် အလွဲသုံးစားပြုခြင်း၏ အကျိုးဆက်၊ သမိုင်း၏ အကျိုးဆက်ကို ခံစားရလိမ့်မည် ဖြစ်ကြောင်း အသိပေး ကြေညာ လိုက်ပါသည်။ ။

အခြေခံ ပညာကျောင်းသားများ သမဂ္ဂ
ဆက်သွယ်ရန် - besunion09@gmail.com

Post a Comment

Please Select Embedded Mode To Show The Comment System.*

Previous Post Next Post

Contact Form